კონფიდენციალურობის პოლიტიკა

წინასწარი ვერსია. დოკუმენტი იურისტის განხილვაშია და შეიძლება შეიცვალოს; ცვლილებისას ვერსიის ნომერი განახლდება.

ვერსია: 2026-10-17-draft

აქ წერია, რა პერსონალურ მონაცემებს ვაგროვებთ purago.app-ზე, რისთვის გვჭირდება ისინი, ვის გადავცემთ და რა უფლებები გაქვთ. ტექსტი ეყრდნობა საქართველოს კანონს „პერსონალურ მონაცემთა დაცვის შესახებ“.

1. ვინ აგებს პასუხს თქვენს მონაცემებზე

თქვენს მონაცემებს ამუშავებს შპს „[სახელწოდება]“ (საიდენტიფიკაციო კოდი [კოდი]), რომელიც Pura-ს სახელით მუშაობს. კანონის ენით, ეს არის „დამუშავებისთვის პასუხისმგებელი პირი“.

• მისამართი: პეკინის გამზირი 24, თბილისი, საქართველო
• ტელეფონი: +995 599 030 091
• ელფოსტა: info@purago.app

პერსონალურ მონაცემთა დაცვის ოფიცერი დანიშნული არ გვყავს. მონაცემებთან დაკავშირებულ ნებისმიერ საკითხზე ამ კონტაქტებით მოგვმართეთ.

[LEGAL] P1. ჩასასმელია იურიდიული პირის ზუსტი სახელწოდება და საიდენტიფიკაციო კოდი. დასადასტურებელია, რომ კომპანიას პერსონალურ მონაცემთა დაცვის ოფიცრის დანიშვნა არ ევალება (კანონის 33-ე მუხლი).

2. რა მონაცემებს ვაგროვებთ

ტვირთის განთავსების ფორმით გვაწვდით:

• ჩატვირთვისა და გადმოტვირთვის მისამართებს, საჭირო მანქანის ტიპს, ტვირთის წონასა და ჩატვირთვის თარიღს;
• თუ შეავსებთ — ტვირთის სახეს, მოცულობას ან პალეტების რაოდენობას, მანქანების რაოდენობას, ჩატვირთვის მხარეს, საჭირო ტემპერატურას, სასურველ ფასსა და შენიშვნებს;
• ვისზე გამოიწეროს ინვოისი — ფიზიკურ პირზე თუ კომპანიაზე; კომპანიის შემთხვევაში მის სახელწოდებასა და საიდენტიფიკაციო კოდს;
• თქვენს სახელსა და ტელეფონის ნომერს.

გადამზიდავად რეგისტრაციის ფორმით გვაწვდით:

• სახელსა და გვარს, ტელეფონის ნომერს, მანქანის ტიპებს და, თუ მიუთითებთ, მიმართულებას, სადაც მუშაობთ.

ფორმის გაგზავნისას ავტომატურად ვიღებთ:

• IP მისამართს, საიდანაც ფორმა გაიგზავნა, და გაგზავნის დროს;
• შემოწმების შედეგს — ფორმას ადამიანი ავსებს თუ პროგრამა (Cloudflare Turnstile);
• თანხმობის ჩანაწერს: რომ თანხმობა მონიშნეთ, როდის მონიშნეთ და ამ პოლიტიკისა და წესების რომელი ვერსია მოქმედებდა;
• ცნობებს, საიდან მოხვედით ფორმაზე: ბმულში ჩაწერილ სარეკლამო ნიშნულებს (UTM პარამეტრები: utm_source, utm_medium, utm_campaign, utm_term, utm_content), ჩვენი საიტის პირველ გვერდს, რომელიც გახსენით (მხოლოდ გვერდის მისამართს, პარამეტრების გარეშე), იმ საიტის დომენს, საიდანაც გადმოხვედით (არასოდეს — სრულ ბმულს), და გვერდის ენას.

შეკვეთის მსვლელობისას ვიღებთ:

• იმას, რასაც შეკვეთის შესათანხმებლად დისპეტჩერს ტელეფონით ან ელფოსტით ეტყვით;
• გადაზიდვის დოკუმენტებს — მიღება-ჩაბარების აქტსა და ინვოისს.

განსაკუთრებული კატეგორიის მონაცემებს — ჯანმრთელობის, მრწამსისა და მსგავსის შესახებ — არ გთხოვთ. გთხოვთ, ნურც შენიშვნებში ჩაწერთ.

თუ საიტს მხოლოდ ათვალიერებთ, ფორმებით არაფერს ვაგროვებთ. საიტზე არ არის არც მომხმარებლის ანგარიშები, არც ანალიტიკა და არც სარეკლამო ტრეკერები. ტექნიკურ მომწოდებლებზე, რომლებიც გვერდის გახსნისას თქვენს IP მისამართს ხედავენ, მე-5 პუნქტში წერია.

3. რისთვის ვიყენებთ მონაცემებს და რა საფუძვლით

კანონის მე-5 მუხლით, მონაცემთა დამუშავება მხოლოდ იქ ჩამოთვლილი საფუძვლით შეიძლება. ქვემოთ თითოეულ მიზანს თავისი საფუძველი ახლავს.

• განაცხადის განხილვა და შეკვეთის შესრულება. გირეკავთ, გითანხმებთ ფასსა და დროს, გიძებნით გადამზიდავს, ვაწყობთ ჩატვირთვასა და ჩაბარებას, განვიხილავთ პრეტენზიას. საფუძველი: გარიგების დადება თქვენი მოთხოვნით და მისი შესრულება (მე-5 მუხლის პირველი პუნქტის „ბ“ ქვეპუნქტი), თქვენი განცხადების განხილვა („კ“ ქვეპუნქტი) და ფორმაზე გამოხატული თანხმობა („ა“ ქვეპუნქტი).
• გადამზიდავების სია. გადამზიდავის ნომერს დისპეტჩერების სიაში ვინახავთ და ვურეკავთ, როცა მის მიმართულებაზე ტვირთი ჩნდება. საფუძველი იგივეა: „ბ“, „კ“ და „ა“ ქვეპუნქტები.
• ინვოისი, ბუღალტერია და გადასახადები. ვწერთ ინვოისს და ვინახავთ საბუღალტრო და საგადასახადო დოკუმენტებს. საფუძველი: კანონი და კანონმდებლობით ჩვენთვის დაკისრებული მოვალეობები („გ“ და „დ“ ქვეპუნქტები).
• ფორმების დაცვა ბოროტად გამოყენებისგან. IP მისამართითა და Turnstile-ის შემოწმებით ვზღუდავთ ავტომატურ და მასობრივ გაგზავნას. საფუძველი: ჩვენი ლეგიტიმური ინტერესი („ი“ ქვეპუნქტი) — ფორმები უნდა მუშაობდეს და დისპეტჩერს ყალბი განაცხადები არ უნდა ხვდებოდეს.
• განაცხადების წყაროს აღრიცხვა. სარეკლამო ნიშნულებით ვხედავთ, რომელი რეკლამა ან ბმული მოქმედებს. საფუძველი: ჩვენი ლეგიტიმური ინტერესი („ი“ ქვეპუნქტი) — რეკლამის ხარჯი გავზომოთ ისე, რომ სხვა საიტებზე თვალი არ გადევნოთ.
• თანხმობის დადასტურება. თანხმობის ჩანაწერს ვინახავთ, რადგან თანხმობის არსებობის მტკიცებას კანონი ჩვენ გვაკისრებს (32-ე მუხლის მე-9 პუნქტი). საფუძველი: „დ“ ქვეპუნქტი.
• სამართლებრივი მოთხოვნები. დავის შემთხვევაში მონაცემებით ვასაბუთებთ ჩვენს პოზიციას. საფუძველი: ლეგიტიმური ინტერესი („ი“ ქვეპუნქტი).

პირდაპირი მარკეტინგისთვის თქვენს მონაცემებს არ ვიყენებთ: რეკლამას არც ტელეფონით გიგზავნით და არც ელფოსტით. თუ ამას ოდესმე დავაპირებთ, ჯერ ცალკე თანხმობას გთხოვთ.

[LEGAL] P2. დასადასტურებელია საფუძვლების არჩევანი. ორი კითხვა თანხმობაზე: (1) ჩაითვლება თუ არა ნებაყოფლობითად თანხმობა, რომელიც სავალდებულო მოსანიშნი ველით მიიღება (32-ე მუხლის მე-2 პუნქტი), და ხომ არ სჯობს მხოლოდ „ბ“ და „კ“ ქვეპუნქტებს დავეყრდნოთ; (2) უნდა გამოიყოს თუ არა მონაცემთა დამუშავებაზე თანხმობა წესებსა და პირობებზე დათანხმებისგან (32-ე მუხლის პირველი პუნქტი) — ახლა ორივე ერთი ველია.

[LEGAL] P3. შესაფასებელია ლეგიტიმური ინტერესი ორივე მიზნისთვის — ფორმების დაცვისა და განაცხადების წყაროს აღრიცხვისთვის (24-ე მუხლის პირველი პუნქტის „დ“ ქვეპუნქტი მათ დასახელებას მოითხოვს). ხომ არ სჭირდება წყაროს აღრიცხვას თანხმობა?

4. სავალდებულოა თუ არა მონაცემების მოწოდება

მონაცემების მოწოდებას კანონი არ გავალდებულებთ. მაგრამ ფორმის ის ველები, რომლებსაც „არასავალდებულო“ არ აწერია, განაცხადის განსახილველად და ხელშეკრულების დასადებად აუცილებელია: მათ გარეშე ფორმა არ გაიგზავნება და ვერც დაგირეკავთ. კომპანიაზე ინვოისის გამოსაწერად მისი სახელწოდებაც გვჭირდება და საიდენტიფიკაციო კოდიც. დანარჩენ ველებს თქვენი სურვილით ავსებთ.

თუ ფორმის შევსება არ გსურთ, დაგვირეკეთ: +995 599 030 091.

5. ვის გადავცემთ მონაცემებს

მონაცემებს არ ვყიდით და სარეკლამო კომპანიებს არ გადავცემთ. იღებენ მხოლოდ ისინი, ვის გარეშეც მომსახურებას ვერ გაგიწევთ.

ჩვენი დავალებით მონაცემებს ამუშავებენ — კანონის ენით, „დამუშავებაზე უფლებამოსილი პირები“:

• Cloudflare, Inc. (აშშ). მის ინფრასტრუქტურაზე მუშაობს საიტი და მონაცემთა ბაზა, სადაც განაცხადები ინახება; მისივეა Turnstile — შემოწმება, რომ ფორმას ადამიანი ავსებს. Cloudflare მონაცემებს ამუშავებს მონაცემთა დამუშავების დანართის (Data Processing Addendum) პირობებით.
• Resend (Plus Five Five, Inc., აშშ). ამ ელფოსტის სერვისით ჩვენს დისპეტჩერებს ეგზავნებათ შეტყობინება ახალი განაცხადის შესახებ; წერილში განაცხადის შინაარსი წერია. Resend მონაცემებს ამუშავებს თავისი მონაცემთა დამუშავების დანართის პირობებით.

მონაცემებს აგრეთვე იღებენ — კანონის ენით, „მონაცემთა მიმღებები“:

• გადამზიდავი და მძღოლი, რომელსაც თქვენი ტვირთი მიაქვს. გადავცემთ ჩატვირთვისა და ჩაბარების მისამართებს, ტვირთის მონაცემებს და ადგილზე საკონტაქტო პირის სახელსა და ნომერს, რომ ჩატვირთვა და ჩაბარება შედგეს.
• დამკვეთი, რომლის ტვირთიც გადაგაქვთ, თუ გადამზიდავი ხართ. შეიძლება გადავცეთ თქვენი სახელი, ტელეფონი და მანქანის ნომერი.
• ბუღალტერი და საგადასახადო ორგანო (შემოსავლების სამსახური, rs.ge) — როცა ამას ინვოისი ან სასაქონლო ზედნადები მოითხოვს.
• სახელმწიფო ორგანოები და სასამართლო — მხოლოდ მაშინ, როცა კანონი გვავალდებულებს.

[LEGAL] P4. შესამოწმებელია: (1) აკმაყოფილებს თუ არა Cloudflare-ისა და Resend-ის სტანდარტული დანართები კანონის 36-ე მუხლის მოთხოვნებს (წერილობითი შეთანხმება და მისი სავალდებულო შინაარსი); (2) Turnstile-ის ნაწილში Cloudflare თავს ნაწილობრივ დამოუკიდებელ დამმუშავებლადაც მიიჩნევს.

6. მონაცემთა გადაცემა საქართველოს ფარგლებს გარეთ

Cloudflare-ის ქსელი მთელ მსოფლიოშია გაშლილი, Resend კი აშშ-შია რეგისტრირებული. ამიტომ თქვენი მონაცემები საქართველოს ფარგლებს გარეთაც მუშავდება, მათ შორის ევროკავშირის ქვეყნებსა და აშშ-ში. ამ კომპანიებთან ურთიერთობას აწესრიგებს მონაცემთა დამუშავების შეთანხმებები, რომლებიც მათ მონაცემთა უსაფრთხოებისა და კონფიდენციალურობის დაცვას ავალდებულებს.

[LEGAL] P5. დასადგენია გადაცემის საფუძველი კანონის 37-ე მუხლით. არიან თუ არა ეს სახელმწიფოები სათანადო გარანტიების მქონეთა ნუსხაში (38-ე მუხლი)? თუ ხელშეკრულებას ვეყრდნობით (37-ე მუხლის მე-2 პუნქტის „ბ“ ქვეპუნქტი), საჭიროა სახელმწიფო აუდიტის სამსახურის ნებართვა (მე-3 პუნქტი). თუ არცერთი არ გამოდგება — მონაცემთა სუბიექტის წერილობითი თანხმობა („დ“ ქვეპუნქტი).

7. რამდენ ხანს ვინახავთ მონაცემებს

მონაცემებს ვინახავთ იმდენ ხანს, რამდენიც მიზანს სჭირდება. შემდეგ ვშლით, ვანადგურებთ ან დეპერსონალიზებული ფორმით ვინახავთ — ისე, რომ მათი თქვენთან დაკავშირება შეუძლებელი იყოს.

• განაცხადი, რომელიც შეკვეთად არ იქცა — ბოლო კონტაქტიდან 12 თვე. ([LEGAL] P6)
• შესრულებული შეკვეთა, ინვოისი და გადაზიდვის დოკუმენტები — 3 წელი იმ კალენდარული წლის დასრულებიდან, როცა გადაზიდვა შესრულდა; თუ კანონი უფრო ხანგრძლივ ვადას ადგენს — იმ ვადით. ([LEGAL] P7)
• გადამზიდავის რეგისტრაცია — სანამ ვთანამშრომლობთ და ბოლო კონტაქტიდან 24 თვე, ან სანამ სიიდან ამოშლას არ მოითხოვთ. ([LEGAL] P8)
• თანხმობის ჩანაწერი (დრო, ვერსია, IP მისამართი) — სანამ შესაბამის მონაცემებს ვამუშავებთ და ამის შემდეგ კიდევ 3 წელი. ([LEGAL] P9)
• გაგზავნების მრიცხველი (IP მისამართი და საათში გაგზავნილი განაცხადების რაოდენობა) — დაახლოებით ორი საათი.
• შეტყობინებები დისპეტჩერების ელფოსტაში — 12 თვე. ([LEGAL] P10)
• სარეკლამო ნიშნულები — თქვენს ბრაუზერში ჩანართის დახურვამდე; განაცხადთან ერთად — იმდენ ხანს, რამდენსაც თავად განაცხადი ინახება.

[LEGAL] P6–P10. ყველა ვადა შეთავაზებაა და იურისტმა თითოეული უნდა დაადასტუროს. P6 — 12 თვე. P7 — 3 წელი ეყრდნობა საგადასახადო კოდექსის 43-ე და 72-ე მუხლებს და სამოქალაქო კოდექსის 129-ე მუხლს; ხომ არ მოქმედებს უფრო გრძელი ვადა (მაგალითად, საბუღალტრო დოკუმენტებზე)? P8 — 24 თვე. P9 — 3 წელი, სახელშეკრულებო მოთხოვნის ხანდაზმულობის ვადა. P10 — 12 თვე; გასარკვევია, რამდენ ხანს ინახავს წერილებს თავად Resend.

8. თქვენი უფლებები

კანონი (III თავი) უფლებას გაძლევთ:

• მიიღოთ ინფორმაცია — მუშავდება თუ არა თქვენი მონაცემები, რა მიზნითა და საფუძვლით, საიდან მოვიპოვეთ, რამდენ ხანს ვინახავთ და ვის გადავეცით;
• გაეცნოთ თქვენს მონაცემებს და უსასყიდლოდ მიიღოთ მათი ასლი;
• მოითხოვოთ მცდარი, არაზუსტი ან არასრული მონაცემების გასწორება, განახლება და შევსება;
• მოითხოვოთ მონაცემთა დამუშავების შეწყვეტა, მათი წაშლა ან განადგურება;
• მოითხოვოთ მონაცემთა დაბლოკვა — მაგალითად, სანამ თქვენს მოთხოვნას განვიხილავთ ან სანამ მონაცემების სისწორე სადავოა;
• მიიღოთ თქვენ მიერ მოწოდებული მონაცემები მანქანურად წაკითხვადი ფორმატით ან მოითხოვოთ მათი სხვისთვის გადაცემა (მონაცემთა გადატანა);
• ნებისმიერ დროს, ყოველგვარი განმარტების გარეშე გამოიხმოთ თანხმობა.

თანხმობის გამოხმობა. მოგვწერეთ info@purago.app-ზე ან დაგვირეკეთ. მოთხოვნიდან არაუგვიანეს 10 სამუშაო დღისა დამუშავებას შევწყვეტთ და მონაცემებს წავშლით, თუ მათი დამუშავების სხვა საფუძველი არ გვაქვს — მაგალითად, ინვოისი და საგადასახადო დოკუმენტები კანონით დადგენილი ვადით უნდა შევინახოთ. გამოხმობამდე შეგიძლიათ გვკითხოთ, რა შედეგი მოჰყვება მას. გამოხმობა არ აუქმებს იმას, რაც მანამდე კანონიერად გაკეთდა.

როგორ გამოიყენოთ უფლებები. მოგვწერეთ info@purago.app-ზე, დაგვირეკეთ ან წერილი გამოგვიგზავნეთ ზემოთ მითითებულ მისამართზე. გიპასუხებთ არაუგვიანეს 10 სამუშაო დღისა; განსაკუთრებულ შემთხვევაში ეს ვადა შეიძლება კიდევ 10 სამუშაო დღით გაგრძელდეს, რასაც დაუყოვნებლივ შეგატყობინებთ. ეს უფასოა. შეიძლება გთხოვოთ იმის დადასტურება, რომ მოთხოვნა ნამდვილად თქვენია — მაგალითად, გადმოგირეკავთ განაცხადში მითითებულ ნომერზე.

გასაჩივრება. თუ ფიქრობთ, რომ თქვენს უფლებებს ვარღვევთ, შეგიძლიათ მიმართოთ სახელმწიფო აუდიტის სამსახურს, რომელიც საქართველოში მონაცემთა დამუშავების კანონიერებას აკონტროლებს, ან სასამართლოს.

[LEGAL] P11. შესამოწმებელია: უფლებებზე პასუხის ვადები; როდის შეგვიძლია მოთხოვნაზე უარის თქმა (მე-16 მუხლის მე-3 პუნქტი, მე-20 მუხლი, 32-ე მუხლის მე-5 პუნქტი); მომთხოვნის ვინაობის დადასტურების წესი.

[LEGAL] P12. ზედამხედველი ორგანო: 2025 წლის 17 დეკემბრის №1289 კანონით პერსონალურ მონაცემთა დაცვის სამსახურის ფუნქციები სახელმწიფო აუდიტის სამსახურს გადაეცა (კანონის 22-ე და 49-ე მუხლები). გამოქვეყნებამდე გადასამოწმებელია ორგანოს სახელწოდება და საკონტაქტო მონაცემები.

9. ავტომატური გადაწყვეტილებები

თქვენ შესახებ გადაწყვეტილებას პროგრამა არ იღებს და პროფაილინგს არ ვიყენებთ: ყველა განაცხადს დისპეტჩერი კითხულობს. ავტომატურად მხოლოდ ორი რამ მოწმდება — ფორმას ადამიანი ავსებს თუ პროგრამა, და ერთი ქსელიდან ზედმეტად ბევრი განაცხადი ხომ არ მოდის. თუ ამ შემოწმებამ შეცდომით შეგაჩერათ, დაგვირეკეთ.

[LEGAL] P13. ჩაითვლება თუ არა ფორმის ავტომატური დაბლოკვა კანონის მე-19 მუხლით გათვალისწინებულ გადაწყვეტილებად.

10. ქუქი-ფაილები და ბრაუზერის მეხსიერება

საკუთარ ქუქი-ფაილებს (cookies) არ ვიყენებთ — არც ანალიტიკისთვის, არც რეკლამისთვის. ორ ფორმაზე მუშაობს Cloudflare Turnstile, რომელმაც შეიძლება ჩაწეროს მხოლოდ ის ტექნიკური ქუქი-ფაილები, რომელთა გარეშეც შემოწმება ვერ იმუშავებს. ამავე ორ გვერდზე სარეკლამო ნიშნულებს თქვენი ბრაუზერის სესიის მეხსიერებაში (sessionStorage) ვინახავთ; ჩანართის დახურვისას ისინი იშლება.

[LEGAL] P14. დასადასტურებელია, რომ Turnstile-ის ქუქი-ფაილები მართლაც აუცილებელთა რიგს მიეკუთვნება და რომ სესიის მეხსიერებაში ნიშნულების შენახვას წინასწარი თანხმობა არ სჭირდება.

11. არასრულწლოვნები

მომსახურება განკუთვნილია სრულწლოვანი პირებისა და კომპანიებისთვის. არასრულწლოვნის მონაცემებს განზრახ არ ვაგროვებთ. თუ ფიქრობთ, რომ მონაცემები არასრულწლოვანმა გამოგვიგზავნა, შეგვატყობინეთ და წავშლით.

[LEGAL] P15. ასაკის ზღვარი და ფორმულირება: კანონის მე-7 მუხლით არასრულწლოვნის თანხმობა 16 წლიდან არის ნამდვილი.

12. სხვა პირის მონაცემები

თუ განაცხადში სხვა ადამიანის მონაცემს უთითებთ — მაგალითად, საკონტაქტო პირს ჩატვირთვის ადგილზე — წინასწარ უთხარით, რომ მის სახელსა და ნომერს ჩვენ და მძღოლს გადასცემთ. ფორმის გაგზავნისას ადასტურებთ, რომ ამის უფლება გაქვთ და ეს პირი ინფორმირებულია.

[LEGAL] P16. როცა მონაცემებს უშუალოდ მონაცემთა სუბიექტისგან არ ვიღებთ, კანონის 25-ე მუხლი მის ინფორმირებას ჩვენ გვავალდებულებს. დასადგენია, როდის და როგორ ვაკეთებთ ამას.

13. უსაფრთხოება

საიტი და ფორმები დაშიფრული კავშირით (HTTPS) მუშაობს. განაცხადებზე წვდომა მხოლოდ ჩვენს დისპეტჩერებსა და ადმინისტრატორებს აქვთ.

[LEGAL] P17. შესამოწმებელია, ასახავს თუ არა ეს აღწერა რეალურ ზომებს (კანონის 27-ე მუხლი) და არსებობს თუ არა ინციდენტზე რეაგირების წესი (29-ე და 30-ე მუხლები: სახელმწიფო აუდიტის სამსახურისთვის შეტყობინება 72 საათში).

14. პოლიტიკის ცვლილება

პოლიტიკას შეიძლება ცვლილება დასჭირდეს. ყოველ ვერსიას თავისი ნომერი აქვს და გვერდის თავში წერია; არსებით ცვლილებას ამავე გვერდზე გამოვაცხადებთ. თანხმობის ჩანაწერში ვინახავთ, რომელ ვერსიას დაეთანხმეთ.

ტექსტი ქართულ, ინგლისურ და რუსულ ენებზეა. თუ ისინი ერთმანეთს არ ემთხვევა, უპირატესობა ქართულ ტექსტს აქვს.

[LEGAL] P18. ენობრივი ვერსიების უპირატესობა და ცვლილების შეტყობინების წესი.

[LEGAL] P19. საიტი ინგლისურ და რუსულ ენებზეც მუშაობს. თუ მომსახურებას ევროკავშირში მყოფ პირებს შევთავაზებთ, შეიძლება GDPR-იც გავრცელდეს (მე-3 მუხლის მე-2 პუნქტი; 27-ე მუხლი — წარმომადგენელი ევროკავშირში). გადაწყვეტილება წინასწარ უნდა მივიღოთ.

მთავარ გვერდზე